భారత్ న్యూస్ గుంటూరు…ఆయుష్ వైద్య సేవల్లో నాణ్యత మరింత పెంచేందుకు, గుర్తింపు లేని వైద్యులకు కళ్లెం వేసేందుకు ఏపీ ప్రభుత్వం కీలక నిర్ణయం తీసుకుంది.
👉 సంప్రదాయ ఆయుర్వేద, హోమియో, సిద్ధ, యూనాని, నేచురోపతి వైద్యానికి ప్రాచుర్యం తెచ్చేందుకు ఆంధ్రప్రదేశ్ అల్లోపతిక్ ప్రైవేట్ మెడికల్ కేర్ ఎస్టాబ్లిష్మెంట్ చట్టం-2022కు సవరణ చేసే బిల్లుకు రాష్ట్ర గవర్నర్ ఆమోదం తెలిపారు.
👉 త్వరలో కొత్త విధివిధానాలు రాబోతున్నాయని వైద్య ఆరోగ్యశాఖ మంత్రి సత్యకుమార్ యాదవ్ తెలిపారు. విధివిధానాల రూపకల్పన కోసం మూడు ప్రత్యేక కమిటీలు ఏర్పాటు చేశారు. టెక్నికల్, ఎక్సపర్ట్స్, స్టేక్ హోల్డర్స్ కమిటీలు వేశారు.
👉 ఒక్కో కమిటీలో ముగ్గురు అధికారులు, సీనియర్ వైద్యులు, నిపుణులు ఉంటారు.
👉 ఈ కమిటీలు ఆయుష్ వైద్య రంగ నిపుణులు, ప్రజల్ని భాగస్వామ్యం చేసి వారి సూచనలు, సలహాలను పరిగణనలోకి తీసుకుని ఈ నెలాఖరులోగా నివేదిక సమర్పించనున్నాయి.
👉 విధివిధానాల రూపకల్పన కోసం కేరళ, కర్ణాటక, తమిళనాడు రాష్ట్రాల్లో అమలవుతున్న ఉత్తమ అంశాలను కమిటీలు పరిశీలిస్తాయని ఆయుష్ విభాగం ఇన్ఛార్జి డైరెక్టర్ రోణంకి గోపాలకృష్ణ తెలిపారు.
👉 కొత్తగా వచ్చే నిబంధనల ప్రకారం క్లినిక్ లు, ఆసుపత్రులు ఆయుష్ శాఖ నుంచి తప్పనిసరిగా రిజిస్ట్రేషన్ పొందాల్సి ఉంటుంది. విద్యార్హతలు కలిగిన వారి ద్వారా మాత్రమే ఆయుష్ వైద్య సేవలు ప్రజలకు అందుతాయి.
